العب كورة اكبر موقع رياضي في الشرق الاوسط
أنا شايف زملكاوية كتير بدأوا يتكلموا عن قدرة الزمالك على المنافسة على الدوري بعد تعادل الأهلي في ماتشين متتاليين
طبعا الطموح والتفاؤل حلو وشىء مشروع ، لكن الواقعة والعقلانية أفضل ولازم نتكلم بالعقل وبالمنطق وبالأرقام اللي عمرها ما بتكذب
1- الزمالك حصد 8 نقاط فقط وفقد 10 نقاط كاملة في أول 6 ماتشات (فوزين وتعادلين وهزيمتين) ومحصلش في تاريخ الدوري الممتاز من بدايته سنة 1948 لحد النهارده ان فريق بدأ البداية دي وكسب الدوري
2- التعادلين بتوع الزمالك منهم تعادل مع المقاولون (متذيل الدوري) اللي معاه نقطتين فقط منهم نقطة من الزمالك ، والخسارتين منهم خسارة من زد الصاعد لأول مرة للدوري الممتاز يعني ماتشين مش صعبين
3- الزمالك حاليا في المركز 11 في جدول الدوري يعن في النصف التاني من الجدول ، وفوقيه 10 فرق مش الاهلي بس لازم يعديهم كلهم عشان يكسب الدوري ، وحتى لو الاهلي وقع وانهار اكيد التسعة التانيين مش هيقعوا كلهم
4- الفارق بين الزمالك وبيراميدز المتصدر 8 نقاط كاملة ، والفارق بين الزمالك والداخلية (التالت) من تحت اللي في مثلث الهبوط 4 نقاط فقط ، يعني بالارقام الزمالك أقرب لمنطقة الهبوط منه لصدارة الدوري
5- الزمالك السنة اللي فاتت كان تالت الدوري ، وباقي الفرق المنافسة في الدوري دعمت صفوفها باستثناء الزمالك هو والاسماعيلي فقط اللي مجابوش ولا صفقة جديدة
6- مش كده وبس ، ده الزمالك كمان رحل عنه لاعيبة كتيرة ، امام عاشور لعب مع الزمالك الدور الاول الموسم الماضي ومشي في يناير ، وفي نهاية الموسم مشي يوسف أسامه نبيه وسيف فاروق جعفر وأحمد بلحاج ومحمود شبانه يعني 5 لاعيبة مشيوا من قايمة الزمالك الموسم الماضي !!
7- مش كده وبس ، ده الزمالك موقوف منه 3 لاعيبة مهمين تانيين لأجل غير مسمى أحمد أبو الفتوح ومحمد صبحي ومصطفى الزناري يعني فقد 8 لاعيبة من قايمة الفريق الموسم اللي فات اللي أساسا كان تالت الدوري
8- أي كلام عن منافسة الزمالك على الدوري الموسم الحالي هو درب من الخيال ويعد من رابع المستحيلات بعد الغول والعنقاء والخل الوفي، ولا حتى سيكون بامكان الزمالك المنافسة على المركز التاني لأن المركزين الأول والثاني سيكونان محجوزان للأهلي وبيراميدز
9- الزمالك بامكانه المنافسة على كأس مصر بعد وصوله للنهائي والتي ستكون مباراة 90 دقيقة امام الاهلي بها كل الاحتمالات ، وبامكانه المنافسة على كأس الكونفيدرالية والتي تضم فرقا متوسطة المستوى في المتناول.
