العب كورة اكبر موقع رياضي في الشرق الاوسط
بقلم : خالد طلعت
امبارح قلت اني مازلت مصمم ومتوقع ان الأهلي هو الأقرب للتتويج بالدوري مش الزمالك ، وناس كتير سألتني عن أسبابي هي دي الأسباب :
1- ماتشات الأهلي أسهل بكتير من الزمالك ومن بيراميدز كمان ، الأهلي خلاص خلص ماتشاته الصعبة مع الزمالك المتصدر ومع بيراميدز التاني ، ومع فيوتشر الرابع ، ومع سموحه الخامس ، ومع البنك الاهلي السادس ، وكل ماتشاته المتبقية مع فرق النص التاني من الجدول بدءا من المركز السابع ولحد المركز 18 والاخير
2- الزمالك لسه متبقي له ماتشات صعبة جدا مع بيراميدز التاني ، ومع فيوتشر الرابع ، ومع سموحه الخامس ، غير كمان ماتشين مع الفرق الشعبية الكبيرة المصري والاتحاد ، وماتش الجونة في الجونة وفاركو في اسكندريه، يعني تقريبا معظم ماتشاته صعبة جدا
3- بيراميدز كمان باقي له ماتشات صعبة جدا مع فرق القمة مع الزمالك المتصدر ، ومع فيوتشر الرابع ، ومع سموحه الخامس، ومع البنك الاهلي السادس
4- الأهلي الفترة اللي فاتت كانت الأصعب لأنها مع مدرب جديد لسه بيتعرف على اللاعيبة ، ومع تحفظي على المدرب بشدة ومتأكد انه مش هياخد بطولة أفريقيا مع الأهلي، ولكن أكيد مع الوقت هيكون أفضل وهيعرف اللاعيبة أكتر وطبيعي الاداء والنتائج هاتتحسن في باقي ماتشات الدوري
5- الأهلي الفترة اللي فاتت كانت الاصعب في غيابات اللاعبين لأن عدد كبير من اللاعيبة غاب للاصابات ومع الوقت اللاعيبة هتبتدي ترجع واحد ورا التاني باستثناء 2 فقط اصاباتهم طويلة وهم حسين الشحات وميكيسوني ودول اصاباتهم وغيابهم في صالح الاهلي مش ضده
6- الزمالك هيرحل عنه أهم لاعبيه وأكثرهم تألقا وهو أشرف بن شرقي اللي هيمشي خلال أيام في نهاية شهر يوليو ، وبالتالي الزمالك هيلعب من غيره حوالي 7 او 8 ماتشات كاملة وكلها ماتشات مهمة وصعبة ، وبن شرقي رحيله هيأثر بشكل سلبي كبير على اداء الزمالك خاصة وان مركزه مفيش لاعب تاني بديل ليه كجناح شمال ، ومعظم لاعبي الطرف في الزمالك كلهم بيلعبوا جناح يمين زي زيزو وشيكابالا واوناجم
7- الزمالك بيلعب بقايمة محدودة من اللاعبين بسبب ايقافه عن التعاقد مع لاعبين جدد ، ورحل منه كمان مروان حمدي في بداية الموسم ومصطفى فتحي في نص الموسم ، وكمان غاب عنه الثنائي المهم جدا أبو جبل وطارق حامد ، وخلال أيام هيرحل بن شرقي ، وكمان رحل رزاق سيسيه ، فيريرا قدر بذكاء وخبرة يعدي كل المشاكل دي في الماتشات الاخيرة بالاستعانة باللاعبين الشباب لكن صعب جدا يكمل كده لنهاية الموسم لأن هيحصل اصابات وايقافات واجهاد والزمالك معندوش البديل الكفء
8- دايما ماتشات الجولات الاخيرة بتعتمد اكتر على خبرة اللاعبين اكتر من الفنيات ، وطبعا في ظل غياب ورحيل عدد كبير من لاعبي الزمالك الخبرة واعتماده على الشباب ، فعامل الخبرة في الجولات الاخيرة هيصب في صالح لاعبي الاهلي بشكل كبير جدا وده هيخليهم يقدروا يحسموا المنافسة على الدوري
9- الأهلي هو المرشح الاول للفوز بالدوري بنسبة 70 % في رأيي ولو الأهلي وقع لأي سبب هيكون بيراميدز ساعتها هو كمان أقرب للفوز بالدوري من الزمالك ، لأنه بيمتلك أقوى قايمة بين الفرق التلاته بس محتاج لاعيبته يركزوا ويثقوا في نفسهم انهم ممكن يحققوا بطولة ، نسبة بيراميدز 20 % والزمالك المرشح التالت في رأيي بنسبة 10 % فقط لكل الأسباب اللي ذكرتها فوق
10- أخر حاجة ماتش كاس مصر الخميس الامور فيه متقاربة جدا ، ونسبة فوز كل فريق 50 % تقريبا ، وانا شايف ان نتيجته أيا كانت مش هتأثر خالص على صراع الدوري ومش هتغير كل كلامي اللي فوق ، وتوقعي لماتش الكاس هاقوله قبل بداية المباراة لما اعرف تشكيل الفريقين لأني زي ما قلت الامور متقاربة وهتفرق على تفاصيل صغيرة قوي في الماتش.
