د.وليد الفيل يكتب لموقع العب كورة : ساقط انتخابات ….بس مش ساقط أخلاقيا

(١) المشهد الأول

فى أحد أيام عام 1995 ….كان الكابتن (صالح سليم) جالسا بجوار غرفة مجلس الادارة مع مجموعة من أصدقائه …. وفوجىء بأحد لاعبى الفريق الأول جاءه (شاكياً) من ثابت البطل رحمه الله .

اقرا ايضا .. صحيفة إسبانية: النصر قد يضطر لبيع لاعبه الجديد لبرشلونة

والذى كان مديرا للكرة فى هذا الوقت …فما كان من كابتن صالح الا أن نهره بصوت عالى سمعه الجميع قائلا : انت مش عارف (تقاليد الأهلى) …مفيش حاجة اسمها لعيب يطلع لرئيس النادى ، كلامك مع (مدير الكرة) ….امشى حل مشاكلك معاه …….ده غير ان أنا رئيس نادى (جوة الأوضة) دى وشاور على غرفة المجلس أما دلوقتى أنا عضو عادى… اللاعب نزل وخد السلم جرى لدرجة ان (الشبشب) وقع منه على السلم وخاف يرجع يجيبه.

(٢) المشهد الثانى:
كابتن صالح كان فى زيارة للسعودية ، وأهداه أحد الأمراء (سيف) من (الذهب الخال …..السيف ده موجود لحد النهاردة فى دولاب الكؤوس …..ولما بيحبوا يلمعوه بيجيبوا 2 عمال يشيلوه من تقله …….المهم أول ماالكابتن رجع مصر سلم السيف ده لخزنة النادى وقال السيف ده جالى عشان أنا (رئيس النادى الأهلى) وبالتالى فهو حق (النادى الأهلى).

■ الموقفين دول يوضحوا كيف كان يدار الأهلى ……..انما ده مش موضوعنا دلوقتى ……..خلينا نروح على المشهد الثالث.

(٣) المشهد الثالث
اللاعب بتاع قصة الشبشب اعتزل ….وبقى اعلامى بارز …….. والشهادة لله …هو (شاطر فى الشغلانة)…. وعنده امكانية انه يكون زى (الأستك) …. قادر انه يبهرك بمرونته فى (التحول) …….ويقنعك بكلام وبعدين يقنعك (بعكسه) …..المهم الباشا طلع فى حديث صحفى فى التسعينات قال فيه نصا : كابتن صالح عايش على (قفا الأمراء السعوديين) ، وجه للنادى (هدية سيف ذهب) كابتن صالح خده وداه بيته ……كابتن صالح وقتها كان فى لندن فمجلس الادارة بقيادة الكابتن حسن حمدى اتخذ قرار تاريخى ب(ايقافه 6 شهور) ……ولما كابتن صالح رجع رفع الايقاف وقالهم نصا (انتم كدة بتعملوا له قيمة).

المشهد الرابع
الاعلامى الكبير اللى بيمثل النهاردة (ناظر مدرسة التدليس الاعلامى) ….طلع يهاجمنى الصبح فى (تويتر) و العصر فى (الفيس بوك) وبعدين بليل فى البرنامج ….. ردا على بوست كتبته على صفحتى الشخصية منتقدا فيه التعاقد مع امام عاشور فى صورة (رسالة الى كابتن صالح سليم)….. متهمنى أنى هاجمته الله يرحمه إلى حد (التطاول) …….وأنى خضت الانتخابات أكترمن مرة وسقطت (سقوط مدوى) ( على حد وصفه).

■ أيوة ياكابتن ……..أنا ساقط انتخابات….بس طيلة (٥٠ سنة) عشتها فى النادى لم أتطاول على كابتن صالح او غيره ……لكن كنت باانتقد (الحاشية) اللى بتتكسب من وراه….

■ ساقط انتخابات ….. لأن الانتخابات مش بالضرورة (بتفرز الأفضل) ….ممكن يكسبها اللى بيجيدوا ألعابها (القذرة) …. ويخسر فيها راجل (واضح) …..و(صريح) ……و(مباشر) ……ومابيسكتش عن كلمة (الحق) اللى بتكون موجعة ومؤلمة لكل (المتعورين) … واللى ليها (تمن) لازم ندفعه…

■ ساقط انتخابات ….عشان مش (وصولى) …ولا (انتهازى) …ولا (أفاق) …. ومابعرفش أكل على (كل الموائد) …ولا أتكلم (بكل الألسنة) …

■ ساقط انتخابات ….انما ماكانش (سقوط مدوى) زى ماسعادتك قلت …..وعمرى ما أخدت أقل من (ثلث أصوات) الجمعية العمومية….وأصواتى كانت (بالآلاف) ….. والسجلات موجودة ….. ده بعد كل حملات (التشهير) و(الاغتيال المعنوى) اللى بتمارسها أبواق (مأجورة) سعادتك عارفها ……..ده غير طبعا (الألاعيب) اللى أنا وانت عارفينها بس مش حأقولها عشان ما أشوهش صورة بنحافظ عليها.

■ ساقط انتخابات …ولو كنت طمعان فى كرسى ….جت لى الفرصة مرتين : الأولى سنة ٢٠٠٤ لما جالى وسيط من كابتن حسن حمدى(وهو حى يرزق) أطال الله فى عمره … فى حضور مجموعة منهم د.محمد شوقى وكابتن أسامة عرابى ….وعرض ان واحد يدخل قايمة كابتن حسن انا أو أشرف طه …والتانى ييجى فى الادارة التنفيذية …واعتذرنا بلطف عشان مانكونش سبب فى مشاكل فى المجلس لأننا كنا مختلفين مع ناس من المجموعة ….

والمرة التانية لما استقال نص مجلس المهندس محمود طاهر وعرض عليا التعيين انا ود.محمد شوقى (وهو موجود فى مجلس الإدارة الحالى) وده بموجب (اللائحة) لأننا كنا (أعلى الأصوات) بعد الناجحين و(رفضنا التعيين)….وكمل م.محمود دورته بخمس اعضاء…

■ ساقط انتخابات …بس انا اصلا مانزلتش آخر انتخابات …. و(ماطعنتش فى الانتخابات) زى ماانت قلت فى البرنامج كعادتك فى تزوير الحقيقة ….
انا رحت المحكمة أدافع عن حقى .

بعد ماتم استبعادى بالعمد من الترشح على منصب النائب بحجة (شهادة التجنيد) وانا فى الخمسينات …ولما كسبت القضية …النادى رتب مع اللجنة الاوليمبية للطعن فى الحكم واتعمل جلسة مخصوص (لاستبعادى) اتحكم فيها قبل الانتخابات (بيوم) …ومارضيتش أكمل فى القضية بعد الانتخابات عشان مااهزش (استقرار) النادى …وكنت قادر أكمل فيها وانا (ضامن) حكم بإعادة الانتخابات) …بس التزمت الصمت عشان خاطر الأهلى..

■ ساقط انتخابات ………بس ماحدش اتكلم فى ذمتى ……وقال عليا بابيع (التيشرتات) و(التذاكر) فى السوق السوداء……

■ ساقط انتخابات …..بس السواق بتاعى (ما أهاننيش)… عشان اتحرشت بمراته ……ولا حد سجل لى مكالمات (خارجة) وذاعها على الهوا …..

■ ساقط انتخابات …….بس ماحدش لبسنى (البيجامة)…. وقعدنى فى البيت سنة لحد مااطلع (أعتذر له) على الهوا ……ولا حد (شخط فىّ) قدام مصر كلها… وقعدت قدامه زى التلميذ وهو بيقول على المجلس (عصابة) و(مستفيدين).

ولا طلعت بعدها (أتسول) منه باسم النادى زى بياعين (المناديل
■ ساقط انتخابات (بشرف) ……..مانجحتش فى مجلس الشعب واعترفت على الملأ انى نجحت بعد (مازورت 5000) صوت.

■ ساقط انتخابات ……بس الحمد لله (محترم) فى النادى والجامعة وعملى الخاص بشهادة كل اللى عرفنى ….ومش (متعور) …….لاحد (كسر عينى) ……..ولا حد (علم عليا) ………..(ما استفدتش) جنيه من الأهلى ……(لاسمسرت) فى لعيبة …….ولا مديت ايدى أخد (ساعة رجالى) ولا (حريمى) …….ولا خدت (X 6( ولا فلل فى (نيو جيزة).

■ ياكابتن …..انت مش محتاج تهاجمنى عشان (ابنك) يلعب …….الولد كويس ربنا يوفقه….. (ولا
تَزِرُ وَازِرَةٌ وِزْرَ أُخْرَى)…

■ أيوة ياكابتن …. أنا ساقط انتخابات …….بس مش (ساقط أخلاقيا) ………

■ احنا ناس (قديمة) فى النادى… وعندنا التاريخ كله من اول نادى (قحافة) ولحد النهاردة ……..

■ و غلاوة (هبة) ….تلم نفسك وتسكت ……
(فَكُلُّكَ عَوراتٌ وللنّاسِ ألسُنُ)…

■ تنويه : اعتذر جدا لكل من يتابعني عن الاطالة ….بس ماكانش ممكن احذف كلمة عشان الناس كلها تعرف الحقيقة.