العب كورة اكبر موقع رياضي في الشرق الاوسط
أنا مش عارف الناس زعلانه من كلام وليد الفراج ليه ؟؟
الكلام اللي قاله كله صح مليون في الميه وأكتر من كده كمان بكتير
احنا احسن مدرب عندنا في مصر أخر 3 سنين اللي هو موسيماني اللي كسر الدنيا واخد 2 دوري ابطال و2 سوبر افريقي ومرتين تالت عالم ، لما راح السعودية درب في الدرجة التانية ولما فريقه صعد للممتاز قالوله شكرا انت مينفعش تدرب عندنا في الممتاز عشان بنجيب مدربين احسن منك بكتير
احنا واحد من نجوم فريق الزمالك اللي هو يوسف أوباما لما احترف في السعودية لعب في فريق درجة تانية في فريق الحزم ومكانش عنصر مؤثر في الفريق ولعب نص موسم 17 ماتش مسجلش فيهم غير جولين ومصنعش غير جولين برضه ولما الفريق صعد برضه قالوله شكرا ومشوه ودوروا على لاعيبة أحسن رغم ان فريق الحزم ده من الفرق المتوسطة في الدوري السعودي مش من فرق القمة
مهاجم الأهلي الأساسي وهدافه في أخر 3 سنين ، وهداف ماتش الدربي (اللي اتكلم عنه وليد الفراج) أخر 5 سنين هو محمد شريف لما جاله عرض من نادي سعودي جاله عرض من فريق الخليج صاحب المركز 14 وده اخر فريق استمر في الدوري الموسم اللي فات وكان قريب من الهبوط وقعد بمعجزة في اخر جولتين ، وشريف عايز يسيب الاهلي العظيم نادي القرن ببطولاته وجماهيره ويروح نادي الخليج
خالد جلال اللي تولى تدريب الزمالك أحد قطبي القمة في مصر فترة لما راح درب في السعودية درب فريق في الدرجة التانية اسمه الشعلة
واحد من أعظم لاعبي الوسط في مصر أخر 10 سنين طارق حامد راح اتحاد جدة والموسم ده لما جابوا نجوم عالميين زي الفرنسي نجولو كانتي من تشيلسي والبرازيلي فابينيو من ليفربول خلاص عايزين يمشوا طارق حامد
أوستن أوموتو اللي كان هداف المصري البورسعيدي ومكسر الدنيا راح نادي اسمه الجندل كان درجة تالتة ولسه صاعد درجة تانية !!
كلام وليد الفراج منطقي جدا ، تفتكروا لو فيه ماتشين شغالين واحد في الدوري السعودي وواحد في الدوري المصري وفيه شخص بيحب الكورة مش مصري ولا سعودي سواء بقى من المغرب العربي او من الخليج او من اوروبا او امريكا
هيختار يقعد يتفرج على رونالدو وبنزيما ومانيه ونيفيز ومالكوم وسافيتش وبروزوفيتش ومحرز وفيرمينو وكيسي وفابينيو وديمبلي وهيندرسون ، ولا هيتفرج على شريف وقفشه والشحات وعبد القادر وطاهر وديانج وشيكا والجزيري والمثلوثي وعبد الغني وعبد المجيد واشرف روقا وسكر ودبش وموسى دياوارا وباسم مرسي وفاروقا كابوريه وسعيدو سنبوريه ؟؟
