العب كورة اكبر موقع رياضي في الشرق الاوسط
نورهان عبد الجواد
يكشف لكم موقع العب كورة الأسباب الحقيقية بانقلاب المستشار تركى آل الشيخ رئيس الاهلى الشرفى على مجلس إدارة الاهلى برئاسة الكابتن محمود الخطيب وتقدمه باستقالته .
فى البداية تخيل معايا كده “رينيه ڤايلر ” واخد اللعيبة وقافل عليهم اوضة اللبس وبيقولهم ينسوا خالص ماتش الذهاب ونتيجة (٢- صفر ) وبيقنعهم انهم لسه ماعملوش حاجة فجأة يدخل واحد عليه يقوله : مساء الخير أبو ناصر باعت المكافآة دي للعيبة عشان كسبوا صن داونز (٢- صفر ) ! هل ده مش اختلال في ألية تحفيز لعيبتي ؟ هل ده مش تضارب وجسم غريب على غرفة ملابس الاهلي ؟
وده كيس الفلوس إللي إدارة الكورة كانت واعياله ووواخدة بالها منه . لاعب النادي الاهلي في اصول لتحفيزه ، بحفزه أنه يعمل تاريخ لناديه ، و بحفزه أنه يعمل تاريخ لنفسه ، وبحفزه بالجمهور المشتاق يرجع يشوف فريقه متسيد افريقيا من تاني ، وبحفزه إنه يبقى جزء من النادي ، والاهلى جزء منه مش على اخر الزمن هحوله لماكينة صرافة يمشي ويلعب بشحن العداد ! وده اللي مش عاجب سيادته !
الجيم ده اتلعب في الزمالك وحول لعيبته لشوية “مرتزقة ” مافيش فلوس يعني مافيش تدريب يعني مافيش لعب يعني هطلع اشرشحلك على الاكونت بتاعي أو اظبط مع صحفي يضربلنا اخبار تجيبهم زاحفين أو اجيبلك المدام تشوف شغلها معاك.. هو مش ده اللي بيحصل في الزمالك ؟
بس عمره ماهيحصل في الأهلي ومش هنسمح لأي شخص ( أي شخص ) يكون سبب في ده .. احترمت بيبو لما رمى افضل لاعب في مصر عشان يحافظ على نظامه ولعيبته وغرفة ملابسه وزعلت منه وقطعته لما رجع “تركى ” وهو عارف إن الراجل ده مش شبهنا ورجعت احترمته لما فرض نظام على مكافآت الراجل اللي عايزها ميغة !
الراجل ده لو بيحب الاهلي مش هيطلع في التوقيت ده وكلنا مشغولين بلقاء العودة و يلوح بالجمعية العمومية والانتخابات ويلمح تلميحات رخيصة ويقولك لكل حادث حديث! ياعم الشيخ افهم الاهلي مناخيره فوق ونظامه الداخلي هيفضل سائد ومتسيد .. حلال عليك فلوسك وحلال علينا نظامنا والموسم الماضي شاهد على نتيجة صراع ( الفلوس VS النظام ).
