العب كورة اكبر موقع رياضي في الشرق الاوسط
شهاب طارق
تحدث محمود عبد المنعم كهربا لاعب النادي الأهلي عن كواليس إنضمامه إلى القلعة الحمراء، وقال كهربا في تصريحات لبرنامج “ملعب أون تايم” مع الإعلامي سيف زاهر: “قلت لموسيماني أول يوم ليه في التمرين أني ممكن إمكانياتي ماتأهلنيش للعب لكن عاملني بس كويس أهم حاجة نفسيا ومن وقتها فعلا عاملني بشكل كويس، وضحيت بإستكمال الإحتراف في الدوري السعودي عشان أخد بطولات مع الزمالك، والدوري السعودي كان أجمل أيام حياتي، وكنت قاعد لوحدي ووالدي ووالدتي كانوا بيترددوا على زيارتي على طول كل شهر عشان يعملوا حج وعمرة، وبحلم إرجع إتحاد جدة تاني لكن بعد ما أخد كل حاجة مع الأهلي“.
وأضاف: “أمير توفيق تحدث معي في بداية موسم الإنتقالات في يناير، ووكيلي قاله كهربا كان مستني اليوم ده من شهر، وبعد الإتفاق مع أمير قعدت مع كابتن الخطيب وقالي أنت إبن النادي وشد حيلك واداني دفعه، الواحد بيتمنى أنه يشوفه أصلا، شوفته في السعودية ومرة وانا صغير في البرنامج بتاعه، وهو بيتكلم معايا كان أحلى يوم في حياتي”.
مضيفا: “إستريحت مع فايلر بعد ما رجع بعد كورونا، وكان بيلعبني أساسي وبيحبني، وهو اللي طلب إنضمامي للأهلي، لكن كانت المشكلة كلها أن كان ليا مشكلة مع جروس وهو سويسري زيه، وعشان كده أنا روحت كلمته وقولتله فيه مشكلة أو حد قالك عني حاجة، قالي لا، فقولتلته خلاص أديني فرصة وفعلا منحني الفرصة بعد كورونا“.
وإختتم كهربا: “في الزمالك كنت مؤمن بالسحر وبخاف جدا، وكانت بتحصل معايا حاجات غريبة، وكنت حاسس أن حد عاملي عمل وكان في مواقف كتير مش فاهم فيها نفسي، والدنيا دلوقتي أحسن بكتير”.
