العب كورة اكبر موقع رياضي في الشرق الاوسط
ناس كتير بتنتقد محمد صلاح وبتهاجمه وبتتهمه بعدم الوطنية وانه متخاذل تجاه القضية الفلسطينية ، وناس بتقارن موقفه بموقف لاعيبه تانيه نشرت بوستات قوية لدعم ومساندة فلسطين وشايفين انهم لاعيبة رجالة ووطنية عكس محمد صلاح
طيب تعالوا ناخد الموضوع واحدة واحدة وبالراحة كده ونفهمه للناس ، عشان كل واحد يعرف الصح
أولا : أنا مبسوط جدا جدا بالبيان القوي اللي نشره أحمد حسن كوكا ، وأنا كشخص أتمنى بشدة ان صلاح يعلن دعمه ومساندته للشعب الفلسطيني ، ولو عمل كده هكون مبسوط جدا وهكون فخور بيه جدا ، ولكن لو معملش كده برضه لازم أقرا اللي بين السطور واحاول افهم هو معملش كده ليه ، وألتمس له سبعين عذرا
ثانيا : مينفعش نقارن موقف صلاح بموقف اللاعبين المصريين اللي موجوين في مصر ، ولا حتى باللاعبين المحترفين في السعودية زي رياض محرز وساديو مانيه ، ولا باللاعبين المحترفين في تركيا زي احمد حسن كوكا (العظيم) وتريزيجيه ، لأن كل دول بالنسبة لهم سهل ينزلوا بيانات دعم عمرها ما هتضرهم في أي حاجة بالعكس هتفيدهم في اكتساب شعبية أكبر في الدول اللي بيلعبوا فيها سواء في مصر أو السعودية أو تركيا ودي كلها دول داعمة للشعب الفلسطيني
ثالثا : مينفعش حتى نقارن موقف محمد صلاح بموقف محمد النني ، لأن صلاح عنصر مهم وأساسي ونجم في فريق ليفربول ، ولكن النني لاعب غير أساسي في أرسنال واحتمال كبير جدا يمشي قريب وينتقل لنادي تاني أقل في انجلترا أو نادي تاني في دولة تانية زي تركيا مثلا حتى لو مكتبش أي تويته دعم ، وبالتالي حتى في أسوأ الظروف لو قرر أرسنال معاقبة النني انه يبيعه او يتخلى عنه بعد التويته دي مش هيفرق معاه كتير او بالبلدي مش هيخسر كتير
رابعا : الرسول أمرنا بعدم الانشغال بعيوب الناس وان كل واحد يركز في عيوبه هو ، وقال (من حسن اسلام المرء تركه ما لا يعنيه) ، وكمان لازم نفتكر المقولة الخالدة الشهيرة للامام جعفر بن محمد الصادق (إذا بلغك عن أخيك الشيء تنكره، فالتمس له عذرًا واحدًا إلى سبعين عذرًا، فإن أصبته، وإلا، قل: لعل له عذرًا لا أعرفه) ، محدش فينا يعرف تعليمات نادي ليفربول للاعبيه ايه بشأن عدم التدخل في أي أمور سياسية وخاصة محمد صلاح باعتباره نجم الفريق ، ومحدش فينا يعرف تعاقد صلاح مع نادي ليفربول فيه بنود ايه وممكن يكون فيه بند بينمعه انه يكتب اي حاجة سياسية ، ومحدش فينا يعرف تعاقد صلاح مع وكيله رامي عباس بيقول ايه ، وغالبا بيقول انه ميقدرش يكتب اي حاجة غير لما ياخد موافقة رامي عباس عليها ، وبالتالي لازم نلتمس العذر لمحمد صلاح ونقدر موقفه الصعب جدا
خامسا : أنا متأكد ان كل اللي بينتقدوا صلاح على الفيسبوك لو كان عقدهم مع المكان اللي بيشتغلوا فيه انهم ميكتبوش حاجة في السياسة ولو كتبوا هيتعرضوا لعقوبة كبيرة هيلتزموا بالعقد ومش هيكتبوا حاجة ، ولو جالهم تعليمات حتى شفوية من مكان شغلهم ايا كان انهم ميكتبوش اي حاجة في السياسة وانهم لو كتبوا هيمشوا مش شغلهم معظمهم هيلتزم بالتعليمات دي ومش هيكتب حاجة ، خصوصا لو كان الشغل ده مصدر رزقهم ومبسوطين ومرتاحين فيه وصعب انهم يلاقوا شغل تاني بنفس المواصفات ونفس الراتب
سادسا : اللي أنا متأكد منه ومن خلال معرفتي بصلاح، ان لو كان صلاح دلوقتي بيلعب في السعودية أو تركيا أو مصر كان كتب تويته قوية وأكد على دعمه ومساندته للقضية الفلسطينية ، والعكس اللاعيبة اللي كتبت رسائل دعم لو كانوا مكان محمد صلاح في ليفربول وعليهم قيود ومحاذير من النادي ومن وكيلهم كان ممكن ناس كتير منهم يسكتوا ومكنوش هيكتبوا نفس رسائل الدعم ، وبالتالي الظروف مختلفة، وكل واحد لازم يحط نفسه مكان الشخص اللي بينتقده ويلتمس له العذر
سابعا : الناس اللي بتهاجم صلاح دلوقتي عشان مقدمش دعم لفلسطين هما نفس الناس اللي قالوله خليك في ليفربول ومتروحش السعودية ، عشان يكمل الانجازات والارقام ويلعب في نادي كبير ودوري قوي، رغم انه لو كان صلاح راح اتحاد جدة كان زمانه قدم رسايل دعم دلوقتي براحته بدون اي قيود ، وبالتالي لازم الناس تعرف ان الانسان مبياخدش كل حاجة ولازم فيه حاجة بتيجي على حساب حاجة تانية
أخيرا : ربنا ينصر اخواتنا في فلسطين وربنا ينجيهم من الكرب ، ولازم نشكر ونشيد بكل نجم مصري دعم القضية الفلسطينية وأبرزهم كوكا والنني وتريزيجيه ، ولازم نلتمس العذر لكل نجم مقدمش الدعم لأسباب مختلفة منها أسباب كتيرة احنا نفسنا ممكن نكون منعرفهاش
